Kun may makita kita nga mga istorya nga nagapakita sang pinasahi nga pagpalangga kag pagtatap sang mga tawo sa mga sapat, nanamian gid kita kag sikreto kita nga nagapasalamat sa ila nga kaayo.
Apang sa syudad sang Tampa sa Florida, USA, isa ka senior citizen ang nagapangatubang subong sang kaso bangud sang iya paghatag sang pagkaon sa layaw nga kuring.
Paano bala ini natabo?
Ang nagpasaka sang reklamo amo ang Tampa Racquet Club Condominium bangud ginapahayag nga ginalapas sang 78 anyos nga tigulang nga si Joan Hussey ang ila pagsulundan paagi sa paghatag sang pagkaon sa layaw nga mga kuring kag sapat.
Wala gintumod kun pila ka sapat ang ginhatagan ni Joan sang pagkaon.
Nagapanindugan ang condominium nga bangud sang ginahimo ni Joan, ginaengganyo pa gid sini ang dugang nga sapat nga magkadto sa ila nga condo.
Bangud sini, ginakahangaw-an nga makatuga ini sang problema sa ikaayong lawas kag sang unwanted damage sa mga propiedad sang mga tenants.
Sabat naman ni Joan, naghatag lang man siya sang pagkaon sa black-and-white nga kuring nga ginatawag niya kay Cleo kag ginhimo man niya ini sa isa ka covered parking space.
Suno pa kay Joan, indi siya makapati kun ngaa pasakaan gid siya sang kaso bangud suno sa iya, kun siya lang ang pahambalon, bilog kabuhi siya nga magatatap sang mga kuring.
Suno naman sa condo association, matig-a gid ang ulo ni Joan. Indi ini ang una nga tion nga ginpasakaan siya sang kaso kag ginhingyo nga untaton ang pagpakaon sa mga layaw nga sapat.
Suno naman kay Joan, tubtob subong, sa iya pagtulog kag pagbugtaw, indi siya mahim-os kun ano gid kadaku ang iya sala nga naglab-ot sila sa pagkinasuhay.
