Nagpadulong sa istasyon sang Bombo Radyo Iloilo ang isa ka senior citizen agud magpabalhag bangud ginkakas ang iya nga ngalan sa makabaton sang social pension nga gina hatag sa mga Senior Citizen sa banwa sang Anilao.
Ang senior citizen ginkilala si Rodolfo Tenezo 78 anyos residente sang Agbatuan, Anilao Iloilo.
Sa interview sang Bombo Radyo kay Rodolfo Tenezo ang nagpabalhag, luyag lang niya nga mabalik ang iya pensyon kag kuntani mangin patas ang paghatag sa ila sang nasambit nga pensyon.
Dugang pa ni Tenezo indi rason nga bangud yara naga ubra sa iban nga pungsod ang iya nga bata kakason na ang iya ngalan sa makabaton sang pensyon.
Samtang sa interview naman sang Bombo Radyo kay Marina Buyco pinuno sang Office of the Senior Citizen Affairs sa banwa sang Anilao, iya ginpahayag nga gin verify nila ang pangalan ni Rodolfo Tenezo sa listahan sang nagabaton sang pensyon kag ginkumpirma nya nga yara sa gihapon ang pangalan ni Tenezo kag sang iya man nga asawa.
Suno kay Buyco, by batch ang pagrelease sang pensyon kag ginahulat nila sa subong ang pag release sang madason nga batch sang pensyon nga ila pagabatunon.
Gin-athag ni Buyco nga wala sila sang may ginkakas nga pangalan sa listahan kag qualified si Tenezo kag ang iya nga asawa nga makabaton sang pensyon.
