Passi City, Iloilo – Pilason ang iloy kag anak sini nga babaye matapos nagbunggo ang ila ginasakyan nga Toyota Fortuner sa isa ka poste kag pader sa Barangay Sablogon, Passi City.
Ang iloy ang naga-edad sang 75 anyos kag ang iya anak naman ang 34 anyos kag amo ang nagamaneho sang salakyan.
Sa interview sang Bombo Radyo kay Fire Officer 1 Jeric John Casamayor sang Passi City Fire Station, iya ginpahayag nga na-trap sa sulod sang salakyan ang mga biktima.
Suno kay Casamayor, gilayon nga nagresponde ang mga rescuers sa ginluntaran sang insidente.
Nag-angkon naman sang pilas kag nagpalanakit ang dughan sang senior citizen matapos naglampos sa pulungkuan, samtang may lagob naman ang iya anak.
Gindala naman ang mga ini sa Don Valerio Palmares District Hospital agud madapatan sang nagakaigo nga pagbulong.
Padayon naman ang imbestigasyon sang Passi City Police agud matumod ang rason sang aksidente.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗝𝗼𝗺𝗮𝗿 𝗩𝗶𝗹𝗹𝗮
