Patay ang 64-anyos nga senior citizen matapos maaksidente ang ginamaneho nga motorsiklo sa Brgy. Aldeguer, Sara, Iloilo.
Angkas sang senior citizen ang iya anak nga 17-anyos halin sa ila puluy-an sa Brgy. Alibayog, Sara kag padulong kuntani sa Pilar, Capiz.
Sa pihak naman nga motorsiklo amo ang 33-anyos nga driver kag angkas sini ang 40-anyos nga lalaki kag lunsay residente sa Brgy. Improgo, Sara.
Sa interview sang Bombo Radyo kay Police Staff Sergeant Samuel Damate, imbestigador sang Sara Municipal Police Station, iya ginpahayag nga nagsaysay ang bata sang senior citizen nga naglain ang pamatyag sini rason nga nadulaan ini sang kontrol kag nakabunggo sa motorsiklo nga yara sa tunga sang karsada nga nagahana magliko.
Nakaagum ini sang pilas sa nagkalain-lain nga parte sang lawas lakip na ang iya ulo nga gintunaan sang iya kamatayon.
(Article: Bombo Phauline Pillora)
