Nagpa-Bombo ang isa ka senior citizen halin sa Barotac Viejo, Iloilo matapos ginkakas ang iya pangalan sa listahan sang benepisyaryo sang senior citizen assistance.
Sa interview sang Bombo Radyo kay Ma. Nida Eugenio, iya ginpahayag nga nagkinahanglan ini nga magkadto sa Manila agud magpa-opera sang iya mata nga may ara sang Catarata.
Naglab-ot ini sang pila ka bulan nga wala makapauli sa Barotac Viejo kag natingala na lang ini nga sa pagbalik na sini wala na ang iya pangalan sa listahan sang senior citizen beneficiaries.
Pahayag pa ni Eugenio nga mabudlay na nga ang iya sitwasyon bangud madamo siya sang ginainom nga maintenance nga bulong kag nagbudlay pa gid nga wala na siya sang ginabaton nga financial assistance.
Gilayon naman ini nga nagkadto sa opisina sang DSWD sa Barotac Viejo agud magpamangkot nahanungod sa iya rekord.
Suno sa iya, imbes nga maklaruhan sang iya concern, ginbasol pa ini sang officer nga na-assign bangud nagkadto ini sa Manila kag naglawig sang madugay nga tyempo.
Nagsabat naman ang Department of Social Welfare and Development Region 6 paagi kay Marielle Tamunan nga suno sa ila may ara na sila nga daan sang existing guidelines kun sa diin kun maglab-ot sa duwa ka sunod-sunod nga wala makakuha ang isa ka senior citizen sang iya nga pension, gilayon na nga makakas ini sa listahan.
Pahayag pa sini nga ila liwat nga pasudlon ang pangalan ni Eugenio apang kinahanglan sini nga maghulat bangud maga-pili liwat ang ila Central Office sa mga bag-o nga pasudlon nga senior Citizen nga maka-avail sang ila nga pension.
