Nag-agaw sang atensyon sang publiko ang istorya sang isa ka 63-anyos nga tigulang sa Pampanga nga 35 ka beses na nga nagpalansang sa Krus bilang reenactment sa sakripisyo ni Hesukristo sa adlaw sang Iya kamatayon.
Ini amo si Ruben Enaje, isa ka panday kag sign painter, kag residente sang Barangay San Pedro Cutud sa City of San Fernando.
Apisar isa na ka senior citizen, ginpas-an sini ang 14 ka tapak nga krus sa Pampanga kadungan sang Byernes Santo. Bangud naman sa iya edad, manubo na lamang sa 20 kilo ang kabug-aton sang krus — indi kaangay sa 37 kilo nga iya nadala sang mas mapagros pa ang iya lawas sang una.
Para kay Enaje, ang iya ginahimo sa kada Semana Santa amo ang iya paagi agud pasalamatan ang Diyos sa iya paglampuwas sa isa ka aksidente sang 1980s.
“Siguro Siya ang gumawa ng aksidente na ‘yun. Kahit na sabihin na natin na aksidente, talagang hindi pa rin Niya ako pinabayaan. Sinalo pa rin Niya ako doon sa pagkahulog ko. ‘Yun ang naging siguro simbulo na gaganap ako bilang Kristo,” pahayag ni Enaje nga nagatumod sa iya papel bilang si Hesus sa Lenten reenactment sang Way of the Cross.
Ginklaro man sini nga wala nila ini ginahimo sa atubang sang Kapampangans agud lamang nga magpadayaw-dayaw.
“Ito ay isang tradisyon namin na ginagawa kapag may hinihingi sa ating mahal na Panginoon. Dadaan muna tayo sa paghihirap para makamit natin ‘yung mga minimithi. Hindi po biro-biro ang ginagawa namin kaya respetuhin po naman ninyo kami sa aming ginagawa. Lalo na ‘yung mga kabataan ngayon, sinasabi na kaya din namin ‘yan pero kapag aktwal na, talagang bibigay sila,” dugang sini.
Ang iya pagpalansang sa Krus subong nga tuig ang ginhimo niya agud magpangayo sang pag-isa sa Pilipinas.
“Marami nang hindi magagandang nangyayari ngayon sa ating bansa. Tayo-tayo mismo naglalaban. Ipagdarasal ko ‘yan na sana magkaisa tayo, maging mabuti sa susunod na taon ang ating bansa.”
Ginpahayag man sini nga antes ang Semana Santa, ginkonsiderar man sini nga untaton na niya ini nga tradisyon bangud sa iya edad apang wala gid ini napaiway bangud indi man sini mabalibaran ang hingyo sang iya mga kabaranggay nga magpangamuyo siya para sa ila nagabalatian nga mga himata.
Nagapati man si Enaje nga mas madamo siya sang dapat pangamuyuan sa sining tion kun sa diin may gyera kag ilinaway nga nakatabo sa nagkalain-lain nga bahin sang kalibutan.#
via Associated Press
