ILOILO CITY – Nagdangop sa Bombo Radyo ang 17-anyos nga dalagita matapos mabiktima sang sextortion.
Sa interview sang Bombo Radyo kay April, senior high school student kag residente sang Mandurriao, ginpahayag sini nga may nag-chat sa iya nga babaye sa diin ginapangayuan siya sang sexy pictures agud ibutang sa magazine.
Nagpakilala ang nag-chat sa iya nga model portfolio manager kag photographer sa isa ka bantog nga studio sa Cebu City.
Naglisensiya ang dalaga sa iya iloy kag nagpasugot man ini.
Suno sa tagreklamo, una ini ginpangayuan sang picture nga naka-bikini.
Sunod naman nga picture amo ang halin sa abaga pakadto sa pusod sa diin kamot lang ang tabon sa iya dughan.
Apang nagsala sa ginpadala nga picture ang dalagita sa diin nadala sini ang iya nga nawong.
Diri kag nagpangabay ang dalagita nga panason ang picture.
Nagpasugot naman ang ka-chat sini sa kondisyon nga makighilawas ang dalagita sa abyan sini nga lalaki.
Ginpahog man sang suspek ang dalaga rason nga nagpadangop na ini sa mga otoridad kag sa Bombo Radyo agud masolbar ang nasambit nga kaso.