Gin-atrasar sang judge ang pagdagdag sang sentensya batok kay President-elect Donald Trump nga naangkot sa iya criminal hush money case.
Nobyembre 26 kuntani naka-schedule nga isapubliko sang korte kun ano ang sentensya sa former president, apang bangud sa desisyon sang huwes, ginakabig ini sang Republican leader nga daku nga kadalag-an samtang nagapreparar siya sa pagbalik sa White House sa Enero.
Bilang justification sa ila nga request, gingamit sang legal team ni Trump ang landmark ruling sang Hulyo halin sa Korte Suprema kun sa diin ginahatagan ang mga presidente sang sweeping immunity sa official acts nga ila ginhimo samtang yara sa pwesto.
Matandaan nga sang Mayo, na-convict si Trump sa 34 felony counts matapos napamatud-an sa korte nga ginmanipula sini ang business records agud tabunan ang alleged sexual encounter sa isa ka porn star antes ang 2016 election.
Magluwas sa hush money case, may duha ka pa ka aktibo nga federal cases batok kay Trump — ang nauna naangot sa iya paninguha nga baliskadon ang resulta sang eleksyon sang 2020 kag ang ikaduha naangot sa classified documents nga iya gin-mishandle matapos nagbiya sa pwesto.
Sini lang nga Nobyembre sang ginpatigayon ang eleksyon sa US kun sa diin nagdaog si Trump batok kay Democrat candidate kag outgoing Vice President Kamala Harris.
