Ginduso sang Office of the Presidential Adviser on Muslim Affairs sa Bureau of Corrections (BuCor) nga ibutang ang Muslim inmates sa lain nga prison facility.
Sandig sa ginpalab-ot ni Presidential Adviser on Muslim Affairs Almarim Tillah kay BuCor director Gregorio Catapang Jr., tuman ka damo ang kabudlayan sang mga Muslim sa presuhan.
Pananglitan maaprubahan ini nga inisyatibo suno sa iya, mahalungan sa gihapon ang kultura sang Muslim kag maprotektahan man ang inmates bangud mahagan-hagan ang risgo sang pagka-bayolente kag pagtuga sang inaway.
May lain man nga mga kinaandan nga ginahimo ang Muslim suno sa iya kaangay sang pagpangamuyo sang lima ka beses kada adlaw kag pagkaon sang halal meals kag pag-puasa sa isa ka bulan nga may lain naman nga pagkaon sa tion sang Ramadan.
Nagpasalig naman si Catapang kay Tillah nga iya ini ipalab-ot kay Justice Secretary Jesus Crispin Remulla.
Ginpahayag man sini nga hilway ang mga inmates sa idalom sang BuCor nga himuon gihapon sa sulod sang presuhan ang ila nga mga kinaandan sa ila nga pagtuo.
Sa data sang talatapan, may yara sang masobra 2,803 Muslim inmates sa tanan nga penal kag prison farms sa bilog nga pungsod.
Suno naman kay Catapang, yara sa masobra 650 ka Muslim inmates ang na-release sa idalom na sang administrasyon ni Remulla.#
