JANIUAY, ILOILO – Ipatuman na sang CS Water Iloilo umpisa subong nga Hunyo ang Septage Management Program sa Janiuay, Iloilo.
Sa interview sang Bombo Radyo kay Engr. Andrew Margarico, General Manager sang CS Water Iloilo, iya ginpahayag nga ang banwa sang Janiuay ang labing una nga Local Government Unit sa Western Visayas nga may yara sang Septage Management Program.
Suno kay Margarico, ang Septage Management Program ang isa ka programa bilang pagsunod sa Philippine Clean Water Act kag may yara sang schedule nga pagasundon sa pagpatigayon sini.
Ginpahayag ni Margarico nga ang Septage Management amo ang pagpasuyop sang higko gikan sa septic tank kag ini ang igahaboy sa disposal site.
Indi mahinago suno kay Margarico nga ang iban nga septic tank ang buta na rason nga naga-awas ang higko padulong sa water source kag mahimo nga tunaan sang balati-an.
Ang pagsukot suno sa natungdan ang igadugang sa water bill sang kondumidor sa tagsa ka bulan.
Nahibalu-an nga ang CS Water Iloilo ang ginabug-usan sang CITICORE Power Inc. kag Summa Water Resources Inc. nga amo ang partner sang Janiuay Water District sa paghatag sang malimpyo nga tubig sa banwa sang Janiuay.
