Nagdistansya si President Ferdinand Marcos, Jr. sa istorya-pulitika kadungan sang iya pagpakigkita kay Naga City Mayor Leni Robredo subong nga adlaw, Pebrero 21.
Suno sa presidente, serbisyo ang dapat nga gina-una kag indi pulitika.
Pahayag pa sini, ang isahanon nga “political thing” nga iya ginhimo subong nga adlaw amo ang pagsuksok sang pink nga medyas. Pink ukon rosas ang nangin campaign color ni Robredo sang nagpadalagan ini sa 2022 presidential elections kontra kay Marcos.
“The most political thing that I did today was wear my pink socks in honor of Mayor Leni,” suno sa presidente samtang nagakadlaw naman ang alkalde.
Nagbalibad man sa paghatag sang komento si Marcos kaangot sa deklarasyon ni Vice President Sara Duterte nga magapadalagan siya sa pagka-presidente sa 2028, kag sa espekulasyon nga posible mag-upod si Senator Imee Marcos sa iya.
“Marami pang kailangan gawin. We will get into that,” pahayag ni Marcos nga nagatumod sa pulitika.
Nahibaluan nga personal nga ginpangunahan sang presidente ang inspeksyon sa operasyon sang Oplan Kontra Baha nga amo ang flood mitigation initiative sang national government sa Sagop Creek sa Barangay Triangulo. Kaupod ni Marcos nga nag-abot sa Naga si DPWH Secretary Vince Dizon.
Antes ang iya pag-abot sa Naga, nagtunog ang espekulasyon kun istoryahan ayhan ang ila alyansa ni Robredo. Sa bahin sang former vice president, una na sini ginklaro nga masako siya sa mga problema sa Naga kag wala pa sa iya pinsar ang pulitika.#
