LEON, ILOILO – Apisar natapos na ang bulan sang Hunyo nga amo ang Pride Month para sa mga katapo sang LGBTQIA+, magapadayon sa gihapon ang pagserbisyo sang LGBTQIA+ Segundo Distrito.
Sa interview sang Bombo Radyo kay Dr. Kathryn Joyce Gorriceta, Founder sang LGBTQIA+ Segundo Distrito, iya ginpahayag nga wala nagatapos ang serbisyo sang grupo sa bulan sang Hunyo bangud subong nga Hulyo kag sa masunod nga mga binulan, may mga medical mission man sa gihapon nga pagahimuon.
Sang tinalikdan nga semana, nagpatigayon sang medical mission ang LGBTQIA+ Segundo Distrito sa Barangay Maliao, Leon, Iloilo sa diin masobra 10 ka mga doctor ang nagtanyag sang nagkalain-lain nga serbisyo medical para sa masobra 500 ka mga benepisyaryo.
Suno kay Dr. Gorriceta, may mga pagpanghangkat man nga ginapangatubang ang LGBTQIA+ Segundo Distrito apang nagapakita ini subong sang mas mabakod nga organisasyon.
Ginakalipay sang natungdan nga amat-amat naman nga gina-recognize kag gina-appreciate sang iban nga distrito sa probinsya ang LGBTQIA+.
