ILOILO CITY- Ginpaathag sang Provincial Agriculture Office ang pagpakita sang madamo nga dolphins sa Concepcion kag Barotac Nuevo, Iloilo sang damlag lang.
Sa interview sang Bombo Radyo kay Dr. Ildefonso Toledo, Provincial Agriculturist, iya ginpahayag nga bugana subong ang Visayan Sea sa sardines, herrings kag mackerel nga amo ang pagkaon sang mga dolphins.
Suno sa iya, ini ang rason kon ngaa sa sini nga mga lugar man nagakadto ang mga dolphins agud mangita sang pagkaon.
Dugang ni Toledo, ang rason sang pagpalapit sang mga dolphins sa manabaw nga parti sang dagat amo nga kinahanglan nila sang warm temperature bangud mammals ukon warm blooded animals ang mga ini kag nagaginhawa paagi sa ila baga(lungs) indi kaangay sa mga isda nga nagaginhawa paagi sa ila hasang.
Pahayag pa sang natungdan, ini ang masami nga rason nga nagaka-stranded man ang mga dolphins sa mga manabaw nga parte sang dagat magluwas pa nga may batasan man ang ini nga mga sapat nga wala nila ginabayaan ang ila upod nga napilasan rason kon ngaa masami sila makit- an nga nagatingob.
