Ginapatutukan ni Passi City Mayor Stephen Palmares sa kapulisan ang imbestigasyon sa nagluntad nga serye sang pagpangluthang patay sa mga senior citizens subong nga bulan sang Hulyo.
Madumduman nga sang Hulyo 5, nasapwan nga wala na sang kabuhi ang mag-asawa sa ugsaran sang ila mismo nga balay sa Sitio Ocad, Barangay Salngan, Passi City.
Ginkilala ang mga biktima nga sanday alyas Rofo, 82 anyos, kag alyas Arci, 62 anyos, nga lunsay mangunguma kag duwa lamang nga nagaestar sa ila balay.
Na-recover sa lugar ang duha ka empty shell sang 45 caliber pistol.
Samtang, sang alas-12:50 sang kaagahon sang Hulyo 9, ginluthang-patay man ang isa ka senior citizen sa Sitio Lunoy, Barangay Cabunga, Passi City.
Ginhinago ang biktima sa kay alyas Jerry, 60 anyos, kag residente sang nasambit nga barangay.
Narekober naman sa crime scene ang bala sang 12 gauge shotgun.
Sa interview sang Bombo Radyo kay Mayor Stephen Palmares, iya ginpahayag nga wala sang koneksyon ang sundanay nga pagpatay sa tatlo ka mga senior citizens bangud tuman ka layo ang distansya sang Sitio Lunoy, Barangay Cabunga kag Sitio Ocad, Barangay Salngan.
Apang padayon nga ginasundan sang kapulisan ang mga lead agud mahibaluan ang motibo sa mga sundanay nga nagluntad nga krimen.
Pahayag pa sang alkalde, isa sa ginalantaw nga posible nga common denominator sa duha ka insidente amo ang ginapatihan nga away sa duta.
Nagapati man si Mayor Palmares nga may ara na sang nagakaigo nga impormasyon ang mga awtoridad agud maestablisar ang mga kaso kag makapasaka sang nagakaigo nga kaso batok sa mga suspetsado.
Nagapanawagan man ang alkalde sa mga barangay officials nga kun may nagaabot nga mga reklamo sang mga pumuluyo nga may kaangtanan sa duta, kinahanglan ini nga gilayon nga ipalab-ot sa Barangay Council agud mahatagan gilayon sang nagakaigo nga solusyon sang mga awtoridad.
