Naglunsar sang petisyon ang grupo sang mga sex workers sa Thailand agud hingyuon sa gobyerno nga untaton na ang pagkabig sa prostitution bilang isa ka krimen.
Suno sa grupo nga Empower Foundation nga amo ang nagasuporta sa sex workers, nagalaum sila nga makatipon sang 10,000 ka pirma agud mapresentar ang petisyon sa parliament kag agud makumbinsi ang mga mamalidha nga islan na ang prostitution law sang pungsod.
Ginpahayag sang grupo nga sa idalom sang ginapatuman nga layi, ginasilutan ang mga sex workers kag 80 porsyento diri ang mga iloy kag breadwinner pa sa ila tagsa ka pamilya.
Bangud sini, daw kaangay nga kriminal ang pagkabig sa ila.
Umpisa sang ginlunsar ang petisyon sang tinalikdan nga Sabado, nagdangat na sa 1,000 ang nagsuporta paagi sa pagpirma.
Ang Thailand ang isa ka Buddhist kag ‘deeply conservative’ nga pungsod apang ini man ang lugar sang masangkad nga sex industry.
Padayon man ang kampanya sang women and LGBT+ rights activists bangud suno sa ila, tuman ka gamay ang ginahimo sang layi agud maprotektahan ang sex workers kag ang sulit-sulit nga pag-aresto sa ila kag pagmulta ang nagatulod pa gid sa kapigaduhon. #
