Nag-sorry na si Megastar Sharon Cuneta kasunod sang isyu nga ‘ginadumilian’ niya ang iban sa pagkanta sang iya hit song nga Sana’y Wala Nang Wakas.
Kun matandaan, sang nagligad nga Marso 10, nag-ibwal si Sharon bangud ginkanta ni senatorial candidate Atty. Salvador Panelo ang iya hit song samtang nagapangampanya.
Suno kay Sharon, makaluluoy man ang iya classic nga kanta kag makahuluya.
Sang ulihi, nagpangayo sang pasensya si Panelo apang nagpaathag nga paborito niya amo nga kanta bangud nagakadumduman niya ang iya nga anak nga si Carlo nga may down syndrome.
Sa latest statement naman sang megastar, ginpahayag sini nga wala niya ginadalok ang iya kanta nga nagaedad na sang 36 anyos.
Nagpangayo ini sang pasensya sa mga tawo nga nasakitan sa iya nga ginpanghambal.
Ginpaathag ni Sharon nga sang amo nga tion, nabatyagan niya nga daw ginpakanubo ang iya bana nga si vice presidential candidate Kiko Pangilinan.
Ini bangud si Panelo ang nagapadalagan sa pagka-senador sa idalom sang Uniteam, kun sa diin kandidato naman sini ni Davao City Mayor Sara Duterte-Carpio.
Suno sa megastar, nasakitan lang siya sang amo nga tion apang gin-ako man niya ang iya nga sala nga ginpaagi niya sa joke kag sarcasm ang iya nga post rason nga wala man nahangpan sang iban.
Sa iya long post, nag-sorry ini sa iya na-disappoint nga mga Sharonians kag nagpasalig man nga indi siya plastic nga sahi sang tawo.
