Nagsabat si anay Justice secretary Vitaliano Aguirre II nga wala na ini nakibot sang gin-dismiss sang korte ang nabilin nga drug case batok kay anay senadora Leila de Lima.
“That has been expected for a long time. As I said before, I am happy for this development as she had suffered enough already,” suno kay Aguirre.
Matandaan nga sa idalom sang liderato ni Aguirre sang gin-file sang Department of Justice (DOJ) ang tatlo ka separado nga mga kaso batok kay De Lima sang tion ni anay presidente Rodrigo Duterte.
Kahapon, Hunyo 24, sang gin-grant sang korte sa Muntinlupa City ang demurrer to evidence nga gin-file sang kampo ni De Lima nga nagakahulugan man nga epektibo nga na-dismiss na ang ikatatlo kag katapusan nga kaso sa iligal nga droga nga na-file batok sa iya.
Pebrero 2017 sang gin-detain si De Lima sa Camp Crame bangud sa ginaalegar nga kahilabtanan sini sa iligal nga droga. Sa iya statement sang nakapyansa ini sang Nobyembre 2023, matandaan nga ginkumpirma man ni De Lima nga ginakonsiderar sini ang pag-file man sang kaso batok kay Duterte kag Aguirre bangud sa ila drug allegations.
