Naghingyo si Iloilo City Councilor Sheen Marie Mabilog kay Iloilo City Mayor Raisa Treñas nga pirmahan na ang Coordinated Executive Sangguniang Panlungsod Efforts for the Development of Iloilo City (CESPEDIC ) Budget agud masweldohan na ang iya mga staff.
Sa ginpatigayon nga Special Session subong nga adlaw, Disyembre 19, nagpabutyag si Mabilog sang pagkadismaya bangud wala sa gihapon ma-release ang iya CESPEDIC budget.
Sa interview sang Bombo Radyo kay Mabilog, iya ginpahayag nga anom na ka bulan nga wala sang sweldo ang iya 3 ka mga staff bangud wala pa mapirmahan sang alkalde ang iya CESPEDIC.
Suno kay Mabilog, kun matuod nga nagapanawagan ang alkalde sang “unity”, respetuhon man niya ang kada opisina nga nagakinahanglan sang budget agud masweldohan ang mga staff.
Dugang pa niya, humalin pa sang Hulyo nga naga-follow-up sila sa opisina sang alkalde apang tubtob subong wala sa gihapon sang sabat.
Nahibaluan nga ang CESPEDIC Budget nga naka-alokar kay Mabilog ang nagalab-ot sa P2-million.
Base sa Regulation Ordinance No. 2007-003, may yara sang P92,000 ang opisina sang kada konsehal sang siyudad.
