Nadala na pabalik sa Pilipinas ang mga kaupdanan ni dismissed Bamban, Tarlac Mayor Alice Guo matapos nadakpan sa Indonesia.
Sanday Sheila Leal Guo nga utod sang anay alkalde kag si Cassandra Li Ong nga authorized representative sang Philippine Offshore Gaming Operator (POGO) nga gin-raid sa Porac, Pampanga ang nag-abot sa Ninoy Aquino International Airport (NAIA) pasado alas singko kaina sang hapon.
Kaina sang nadakpan sang Indonesian authorities ang duha kag sila ang gilayon nga ginsugat sang Philippine Immigration officers para mabalik sa Pilipinas.
Gin-diretso sa kustodiya sang National Bureau of Investigation (NBI) ang duha agud nga ma-debrief samtang ang Bureau of Immigration ang maga-conduct sang inquest proceedings kay Sheila Guo kaangot sa Immigration charges.
Si Ong, nga official representative sang Lucky South 99 POGO, ang gindagdagan anay sang contempt order nga gin-isyu sang apat ka House committees bangud sa pagpamalibad nga magtambong sa imbestigasyon sa POGO-related crimes kalakip na ang ginaalegar nga involvement sa firm.
Una na ginpahayag sang Lucky South 99 nga documented corporate secretary nga si Ronalyn Baterna sa House probe nga nag- isyu siya sang tseke sa ila mga kliyente kalakip na ang balor P500,000 nga halin kay Ong.
Matandaan nga si Ong ang isa man sa mga tawo nga nalista sa immigration lookout bulletin order nga gin-release sang Department of Justice (DOJ).
Madumduman nga ginsiling sang Philippine Amusement and Gaming Corporation (Pagcor) nga gin-reject sini ang reapplication sang lisensya sang Lucky South 99 bangud sa pila ka violations nga nakit-an sa ila internal findings. #
