Ginkumpirma sang National Bureau of Investigation (NBI) nga isa ka Chinese citizen nga nagahingalan kay Zhang Mier si “Sheila Leal Guo” nga amo ang utod ni anay Bamban, Tarlac Mayor Alice Guo.
Suno sa bureau, paagi sa comparative fingerprint analysis, nadetermina nga si Guo kag Zhang ang isa lamang ka tawo kag natukiban man nga nagpanunto ini agud makakuha sang Philippine passport.
Sang nadakpan si Sheila sa Indonesia kaupod si Cassandra Li Ong nga isa man ka authorized representative sang iligal nga POGO hub sa Porac, Pampanga, nakuha sa possession sini ang iya Chinese passport kun sa diin nakabutang ang iya Chinese name.
Sini lang nga Byernes sang ginpaidalom si Guo sa inquest proceedings sa NBI headquarters sa Manila.
Sanday Ong kag Sheila ang subong nagapangatubang na sa mga reklamo nga naangot sa obstruction of justice, pagtago sa pugante, kag violation sang Philippine Passport Act.
Apisar sarang mapyansahan ang ila mga kaso, indi sila mahimo ma-release bangud may arrest warrants pa gid nga na-isyu ang Senado kag Kamara batok sa ila.
Suno pa sa Bureau of Immigration (BI), kasuhan pa gid si Sheila bangud sa paglapas sa Philippine Immigration Law kasunod sang iya pagpakuno-kuno bilang isa ka Filipino citizen.
Nagapabilin sila subong sa kustodiya sang NBI.
Kun basehan ang statement ni Senate spokesperson Arnel Jose Bañas, pagadal-on sila sa Upper Chamber sa Martes, Agusto 27, para sa pagpadayon sang legislative hearing sa gin-raid nga POGO firm sa Tarlac.
