ILOILO CITY- Isa ka rebelasyon ang ginhimo ni Shiela Guo sa Senate subpanel matapos gintuad sini nga indi niya biological sister si Alice Guo kag nakilala lamang niya ang dismissed Bamban mayor sang siya nagaedad sang 17 ukon 18 anyos.
Ini kadungan sang iya pag-atubang sa Senate subpanel on justice and human rights kun sa diin ginpahayag man niya nga ang ginikanan ni Alice nga sanday Jian Zhong Guo kag Wen Yi Lin ang indi niya matuod nga iloy kag amay.
Si Sen. Sherwin Gatchalian ang naghaboy sang pamangkot kay Shiela.
Antes kay Gatchalian, una na namangkot si sub-panel head Sen. Risa Hontiveros kun sin-o ang matuod nga ginikanan ni Shiela apang namalibad ini nga magsabat bangud nga suno sa iya may yara ini sang pending case.
Magluwas diri, ginsiling man ni Shiela nga wala siya ginbun-ag sa Pilipinas.
Base sa iya existing records, si Shiela nag-abot sa Pilipinas sang 2001 kag antes diri, ginsiling niya nga naghalin siya sa China.
Ginkwestyon ni Hontiveros kun ano ang rason nga kinahanglan nila maghimo sang Filipino identity kag magkuha sang Filipino citizenship kag ginsabat ni Shiela nga ang iya amay ang naghatag sa iya.
Antes sini, gintuad na ni National Bureau of Investigation Director Jaime Santiago nga si Shiela amo ang Chinese national nga si Zhang Mier kag napamatud-an ini paagi sa comparative fingerprint analysis nga nagpakita nga isa lang sila ka tawo
Nahibaluan nga ginsiling ni Shiela nga wala siya makahibalo kun ngaa nagbiya sila sa Pilipinas kag wala man ini sang hinalung-ong nga ginapangita sang otoridad ang iya utod nga si Alice Guo.
Ang iya pagkahibalo amo nga nasubuan ang iya utod kag nagapaupod apang wala siya nakahibalo nga magapadulong sila sa Malaysia.
Ginsaysay man sini nga nagbiya sila sa Pilipinas sakay sa “a small white boat” kag nagsaylo sa duha ka dalagko nga boats padulong sa Indonesia kun sa diin sila nagseparar.
Si Shiela nga incorporator sang Philippine offshore gaming operator (POGO) Whirlwind Corp., ang naaresto sang Indonesian authorities sa Mega Mall Batam Centre, sa Riau, Indonesia sang Agusto 20, 2024.
