ILOILO CITY – Indi pa handa ang shipping companies sa pagbyahe sa ruta nga Iloilo City-Bacolod City vice versa.
Ini ang kasunod sang ginpatigayon nga pagsinapol sang Maritime Industry Authority, mga opisyal sang Iloilo City kag Bacolod City Government kag mga tiglawas gikan sa shipping companies.
Sa interview sang Bombo Radyo kay MARINA Region 6 Director Jose Venancio Vero, iya ginpahayag nga mayor nga ginaproblemahan amo ang numero sang mga pasahero.
Suno kay Vero, apisar nga ginpahalugan ang rekisitos, tuman ka gamay sa subong ang mga pasahero bangud sa pandemya kag magapamiyerdihan ang shipping companies.
Ginpahayag naman ni Iloilo City Mayor Jerry Treñas nga “problematic” ang sitwasyon bangud nga may yara sang restriction ang Negros Occidental kun sa diin requirement ang pagpaidalom sa RT-PCR test kag sa quarantine.
Bangud sini, ang mga may tuyo nga magpadulong sa nasambit nga probinsya ang indi na lang magbyahe.
Kun ang pasahero lang gikan sa Iloilo City kag Bacolod City ang saligan, ginpahayag sang alkalde nga indi gid makabawi ang shipping companies.
May kaangtanan diri, nagapakig-angot naman ang natungdan sa Regional Inter-Agency Task Force agud nga masolusyunan ang nasambit nga problema.
