Ginausisa sang mga otoridad ang impormasyon nga konektado sa online group nga may kaangtanan sa pagpamintas kag kasingki ang estudyante nga suspek sa pagpangluthang sa sulod sang eskwelahan sa Banga, South Cotabato subong nga adlaw, Septyembre 18.
Suno kay South Cotabato Governor Reynaldo Tamayo, base sa inisyal nga imbestigasyon, ginluthang man sang suspek ang iya nga kaugalingon matapos ang pagpaniro sini sa iban sa Banga National High School.
Nakaistorya man sang mga otoridad ang suod nga abyan sang estudyante kag ginpahayag nga miyembro ini sang isa ka online group nga ginatawag “True Crime Community.”
“Ang inisyal lamang na aming nakita ay nakausap namin yung best friend ng bata. Itong bata pala ay miyembro ng True Crime Community. So ito ay iniimbestigahan pa rin ng ating kapulisan kung ano ba ito at ano ba nakapaloob [sa] internet community na ito,” suno kay Tamayo.
As of 5:00 p.m., wala pa nagapalareho ang mga report tuhoy sa aktwal nga kadamuon sang mga napatay kag nasamaran sa pagpangluthang.
Base sa ginpahayag sang Department of Social Welfare and Development (DSWD), anum ka estudyante ang napatay kag 17 pa ang nasamaran sa insidente.
Ginpapauli naman ang mga estudyante agud mapakalma ang ila emosyon, samtang nanawagan si Tamayo sa mga ginikanan nga siguruhon nga indi madali nga ma-access sang mga kabataan ang mga armas.
Ginpasiguro man sang gobernador nga magahimo ang provincial government sang mga tikang agud malikawan kag mapunggan ang pagbalik sang amo sini nga insidente sang pagpangluthang.#
