ILOILO CITY – Ginmanduan sang Police Regional Office (PRO) Western Visayas ang Iloilo City Police Office (ICPO) nga imbestigaran ang nagakatabo nga asud-asud nga shooting incidents sa syudad sang Iloilo.
Sa interview sang Bombo Radyo kay Pol. Lt. Joem Malong, tagpamaba sang PRO 6, iya ginpahayag nga makabig nga alarming na ang mga insidente bangud nagakapakita ini nga wala nahadlok ukon natahap ang mag suspetsado sa pagsulod sa balay sang biktima.
Kaangot diri, may yara sang ginapatigayon nga enhanced management police operations agud mahatagan sang pagtamod ang mga nasambit nga krimen.
Kinahanglan man suno kay Malong nga i-activate ukon paganahon ang mga intelligence networks agud makilala ang mga identity sang mga suspetsado.
Dugang pa sang natungdan, kon pagabasehan ang pattern sang mga krimen, ginalantaw man ang posibilidad nga may yara sang organized groups sa likod sang mga ini apang indi pa lubos nga makumpirma sang otoridad bangud sa kakulang sa ebidensya.
Nahibaluan nga sa ginpatigayon nga imbestigasyon, ginasekyar anay ang background sang biktima nga posible makatumod sa motibo sang insidente.
Masunod suno kay Malong amo ang pagkuha sang pahayag sang mga tawo nga yara sa palibot sang crime scene.
Aminado man ang PRO 6 nga indi malikop sang kapulisan ang bug-osa nga syudad bangud sang kakulang sang personnels, apang may yara gihapon sang mga beat kag mobile patrollers nga naka deploy sa mga area.
MOTOR-RIDING CASES.
Kaangot naman sa mga insidente nga nagaluntad bangud sang motor-riding suspects, gina-ako man sang PRO 6 nga indi madali-dali ang pagsolbar sa mga kaso bangud wala sang witnesses kag bangud wala man gihapon sang identity ang mga suspek.
Apang gin-athag ni Malong nga wala ini nagakahulugan nga wala sang ginaobra ang kapulisan kag ginapabayaan na lang ini nga ‘unsolved‘.
Suno kay Malong, wala man sang limitasyon ang pagpatigayon sang mga imbestigasyon bangud tanan nga mga bagay kag kaso ang gina-atubang tanan sang kapulisan kag may yara sang ginatawag nga ‘adjustments‘ sa police operations.
