Ginsipa ang show director sang Olympics opening ceremony nga si Kentaro Kobayashi, antes ang pagbukas sang Tokyo 2020 Olympics karon sa gab-i.
Ini matapos nagwa ang pila ka mga video ni Kobayashi sa diin ginlango-lango sini ang natabo nga holocaust.
Nahibaluan nga natabo sang World War II ang holocaust ukon state-sponsored persecution sa diin ginpaidalom sa genocide ang six million ka mga Jews sa idalom sang Nazi regime.
Suno kay Japanese Olympic chief Seiko Hashimoto, makabig nga isa ka yaguta sa maragtas ang amo nga mga video.
Suno naman kay Japanese Prime Minister Yoshihide Suga, isa ka dako nga kahuy-anan ang mga nangin pahayag ni Kobayashi sa videos.
Bangud sini, nagpangayo man sang pasaylo ang show director.
Si Kobayashi ang isa lamang sa mga opisyal nga ginpahalin sa Olympic sang nagligad nga mga bulan.
Sang tinalikdan nga mga inadlaw, nagbiya sa pwesto ang composer sang Olympic bangud sa ginapahayag pagpang-bully sa abyan sini nga may sablag sa lawas.
Sang Marso sa sini nga tuig, ginsipa man ang chief sang Olympic creative nga si Hiroshi Sasaki matapos ginbasagan nga “Olympig” ang Japanese plus-sized comedian nga si Naomi Watanabe.
Napilitan man nga magpanaog sa pwesto si Yoshiro Mori bilang head sang organizing committee matapos ginlaslasan ang mga kababainhan nga ginapahayag nagaginahod sa tion nga may mga pagsinapol.
