ILOILO CITY- Ginplastar sang isa ka political analyst nga ang “show of force” sang mga kandidato sa ulihi nga mga inadlaw sang campaign period antes ang eleksyon sa Mayo 9, ang may impluwensiya sa mangin desisyon sang mga botante nga “fence- sitter” ukon wala pa sang desisyon kun sin-o ang botohon.
Sa interview sang Bombo Radyo kay Atty. Joenar Pueblo, isa ka Bombo Abugado, iya ginpahayag nga may yara sang ginatawag nga bandwagon effect ukon ang posibilidad nga mahimo nga mahaylo ang mga botante nga botohon na lang ang kandidato nga sa ila panulukan, amo ang mapag-on bangud may yara ini sang tuman ka damo nga supporters sa iya grand rally.
Sa bahin naman sang mga pag-endorso sang mga religious group sa isa ka kandidato, halimbawa diri ang pag-endorso sang Iglesia ni Cristo (INC) sa BBM-Sarah tandem, ginpaathag ni Pueblo nga kun sadto, may yara gid man ini sang bug-at para sa kadalag-an sang kandidato, apang sa subong, nagbag-o na ang trend sini kag ehemplo diri amo ang 2016 elections kun sa diin gin-endorso sang INC si Marcos sa pagka-bise presidente apang napierde ini sa gihapon ni Leni Robredo.
Paathag pa sang Bombo Abugado, mas maalam na ang mga botante sa subong kag indi na madali-dali ganyaton bangud gid lang sa show of force sang isa ka kandidato.
