ILOILO CITY – Naghingyo ang pila ka mga vendors sa Iloilo City Government sang grace period agud mapahanugutan nga magbaligya sa mga sidewalk.
Ini ang kasunod sang ginhatag nga deadline sang Department of the Interior and Local Government (DILG) sa tanan nga local government units (LGUs) para sa Road Clearing 2.0 kag validation nga nagsugod sang Pebrero 16 kag magatakop sa Marso 2.
Sa interview sang Bombo Radyo kay Niel Dichupa, pinuno sang Sidewalk Vendors Association, iya ginpahayag nga nakigsapol sila sa DILG agud magpangayo man sang bulig.
Suno kay Dichupa, naghatag man sang suhestyon ang DILG nga magpasa sila sang proposal sa Iloilo City Government sa diin pahanugutan sila nga mag-angkon sang lugar kag tinion nga may proper measurement sa diin indi makasablag sa dalanon kag makabaligya sa mga sidewalk.
Nagpasalig man ang natungdan nga handa sila nga magsunod sa tanan nga pagsulundan sa kondisyon nga makabalik sila sa negosyo ilabi na nga pigado sa subong ang pangabuhi bangud sa pandemya.
Samtang, gintuad man sang DILG nga wala sila may mahimo kundi maghatag lamang sang suhestyon sa mga vendors bangud nagatuman lamang sila sa mando sang Iloilo City Government.
Sa interview sang Bombo Radyo kay Iloilo City DILG Director Oscar Lim, iya ginpahayag nga kun nagasunod lamang ang tanan nga vendors sa insakto nga order sa dalanon, wala sang clearing nga matabo.
Apang apisar sini, nahangpan niya ang sitwasyon sang mga manugbaligya kag mas maayo istoryahon nila sang maayo ang Iloilo City Government agud nga makabalik sila sa negosyo.
Kun nagasunod lang ang tanan suno sa iya, wala gid sang imposible sa negosyo ilabi na sa mga sidewalk.
Ginpahayag naman sang alkalde sa syudad sang Iloilo nga sugot siya sa hingyo sang mga manugbaligya sa kondisyon nga ‘orderly’ kag nagasunod ang mga ini sa guidelines nga ipaggwa sang Iloilo City Government.
Sa interview sang Bombo Radyo kay Iloilo City Mayor Jerry Treñas, iya ginpahayag nga magasapol siya sa Sidewalk Vendors Association.
Suno kay Treñas, nagahulat nalang siya sang pormal nga kasulatan nagikan sa nasambit nga asosasyon.
