Nangin mas malala kuntani ang sitwasyon sa pila ka parte sang Luzon kun wala ang kabukiran sang Sierra Madre samtang nagalaslas si anay Super Typhoon Pepito sang weekend.
Suno sa state weather bureau nga Philippine Atmospheric, Geophysical, and Astronomical Services Administration (PAGASA), bangud sa Sierra Madre, napatahaw ang impact ni Pepito bisan nga na-eksperyensyahan ang mabaskog nga pag-ulan sa Catanduanes kag sa pila ka mga isla nga sakop sang probinsya sang Quezon.
Kilala ang Sierra Madre nga amo ang pinakamalaba nga mountain range sa Pilipinas. Nagalawig ini sang 540 kilometros halin sa probinsya sang Cagayan tubtub sa nasidlangan nga parte sang Luzon island.
Sa pinakanaaminhan nga parte sini nga kabukiran nahamtang ang Northern Sierra Madre Natural Park nga amo man ang ginakonsiderar nga “largest protected area” sa bilog nga Pilipinas.
Sang naglaslas si Pepito, gintabok sini ang upperlands sang Sierra Madre. Halin sa Aurora, nagtabok ini sa Quirino, Nueva Vizcaya, Benguet, kag La Union antes nagbiya sa landmass sang Luzon sang Domingo sang gab-i kag nagdiretso na sa West Philippine Sea.
Antes kay Pepito, isa man ang Cagayan Valley sa mga lugar nga pinakaapekto sang sunod-sunod nga tropical storms sa pungsod.
Ang isa pa ka factor nga ginalantaw sang bureau sa mas matahaw nga impact sa Luzon amo bangud naka-landfall na ang bagyo — una sa Panganiban, Catanduanes kag ikaduha sa Dipaculao, Aurora — kag nabuhinan ang moisture nga gina-enhance sang bagyo ikumpara sang yara pa ini sa kadagatan.
Kun isipon halin sang Oktubre 21 tubtub subong umpisa kanday Kristine kag Leon, si Pepito na ang pang-anum nga bagyo sa Pilipinas sa sulod lamang sang isa ka bulan.
Wala subong sang gina-monitor nga low pressure area malapit sa Philippine Area of Responsibility (PAR).
