Magapadalagan liwat si anay President Rodrigo Duterte bilang alkalde sa Davao City.
Natabo ang anunsyo sang nagpamangkot si Duterte sa mga miyembro sang media kun pabor man ang publiko nga magbalik siya bilang mayor nga amo ang iya posisyon antes ang pagpungko bilang presidente sang Pilipinas sang 2026.
Sang positibo ang sabat sang media, nagsabat ang former president nga magapa-eleher siya liwat kag mangin vice mayor sini ang iya anak nga si incumbent Mayor Sebastian ”Baste” Duterte.
Nagsabat man ini sa panawagan nga magpadalagan siya bilang senador kasunod sang mga nagaguluwa nga opinion polls nga isa man siya sa ginapaboran nga maka-secure sang pwesto sa Senado sa 2025 elections.
Pahayag sini, sa iya edad subong nga 79-anyos, delikado nga basi kun mag-collapse na ini.
Matandaan nga ang iya pa gid anak nga si Vice President Sara Duterte ang una nag-anunsyo nga ang amay nga Duterte kaupod sanday Sebastian kag Davao City Rep. Paolo Duterte ang magapadalagan sa Senado, apang gin-deny ini sang former president kag nagsiling nga naga-joke lamang si Sara.
Nagsiling man ini nga wala siya nakahibalo kun sin-o sa iya mga anak ang magapadalagan bilang senador bangud wala pa sila sang pinal nga naistoryahan.
Balantayan kun maga-file si Duterte sang Certificate of Candidacy (COC) ilabi na bangud kilala man ini sang publiko nga pagulpi-gulpi sa iya mga statement nga kun kaisa ginabawi man kag gina-islan sang bag-o nga mga pahayag.
