Ginalantaw sang Iloilo City Disaster Risk Reduction and Management Office (CDRRMO) nga isa ka concern sang syudad ang sige-sige nga pagbubo sang ulan.
Ini kasunod man sang malain nga tyempo nga dala ni Bagyong Kristine.
Sa interview sang Bombo Radyo kay Darwin Papa, Operation Officer sang Iloilo City Disaster Risk Reduction and Management Office, iya ginpahayag nga madasig mag-subside ukon magnubo ang tubig apang, ginalauman nga makatuga ini sa gihapon sang minor flashfloods bangud man sa volume sang tubig nga dala sang pag-inulan-ulan.
Gin-ako man sang natungdan nga posible maapektohan ang mga barangay sa syudad nga yara sa low lying areas kag ang yara sa coastal areas.
Suno kay Papa, nagapabilin nga yara sa ‘intermittent’ ang rainfall forecast sa syudad.
Gin-athag man sini nga padayon ang ila intensive monitoring sa palibot kag validation sa mga mahimo mahalit sang Bagyo Kristine.
