ILOILO CITY – Ginkumpirma sang mga otoridad nga nasiplatan nila sa distrito sang Jaro kag Mandurriao ang top drug lord sa Western Visayas nga si Richard Prevendido.
Sa interview sang Bombo Radyo Iloilo kay Philippine Drug Enforcement Agency (PDEA) Deputy Director Levy Ortiz, ginpahayag sini nga may nagpadangat sa ila sang reports nga nakit-an sang nagligad nga semana si Prevendido sa LJ Ledesma Subdivision sa Barangay MV Hechanova, Jaro, Iloilo City.
Gilayon naman nila nga ginsulod ang nasambit nga balay sa diin ginatudlo naga-istar ang hinablos ni Prevendido apang wala ang presensya sang drug lord.
Samtang, duha ka bulan naman ang nagligad, ginpahayag sang mga residente sang Brgy. Bakhaw, Mandurriao, Iloilo City nga nasiplatan man nila ang drug lord sa balay sang utod sini nga si Punong Barangay Remia Prevendido Gregori sang nasambit nga lugar.
Apang nagpakatig-a naman ang opisyal nga magpasulod sa ila balay kadungan sa pagdepensa nga wala sini ginatago ang iya utod nga drug lord.
Nahibaluan nga sa karon nagadangat na sa P1.1 million ang patong sa ulo ni Prevendido.