Magahimo na sang committee report ang Sangguniang Bayan sang Oton, Iloilo kaangot sa ginaproponer nga tukuron nga hyperscale AI data center sa Barangay Abilay Sur sa amo nga banwa.
Ini kasunod sang public consultation nga ginpatigayon subong nga adlaw, Agusto 14, nga wala man natapos bangud sang pag-walkout sang proponent nga si Daniel Stefan Robertsen.
Si Robertsen amo ang data center manager sang Terakraft AS, isa ka AI data center operator nga nakabase sa Oslo kag Sauda sa Norway.
Sa interview sang Bombo Radyo kay Oton Vice Mayor Jose Neil Olivares, iya ginpahayag nga kun siya ang maghangop, daw kaangay nga senyales na sang pag-withdraw sang proposal ang pagguwa ni Robertsen sa venue.
Gintawag sini nga “unprofessional” ang amo nga akto sang Norwegian national kag kuntani suno sa iya nangin “gentleman” ini sa pagsabat sa mga pamangkot.
Nag-ako man si Olivares nga na-offend siya bangud daw kaangay nga gin-snub ni Robertsen ang mga Ogtonganon — bagay nga daw “pagtampalas” sa ila.
“Gin-deprive ya ang mga pumuluyo nga makapamangkot kag makasabat sa iya nga proposal,” suno sa bise-alkalde. “For me, ang iya pag-walkout is a sign of his withdrawal.”
Pahayag pa sini, “Sa committee level pa lang ni subong, sa consultation level pa lang, the committee is yet to render a report. Maybe next week, we can now render the report, para ma-archive ta na lang kay indi naman siya interesado.”
Samtang yara sa Chapel sang barangay kaina, nag-walkout si Robertsen samtang makit-an naman ang mga tumalambong nga nagapalakpak.
Makit-an naman ang iban nga mga residente nga nagkadto sa venue kag may dala nga posters kun sa diin nakasulat ang mga posible nga halit nga dal-on sang data center sa komunidad.
Lakip diri ang: “Pax Silica, halit sa mga mangunguma”, “Data center, halit sa lupa kag tubig”, “Hindi ipagpapalit ang lupa at tubig at kabuhayan,” kag “No to Pax Silica.”
Sang yara naman sa gwa, ginpalapitan sang media si Robertsen apang naakig ini sa nagakuha sa iya sang videos. Nagpamahog pa ini kun padayunon ang pagkuha sang footage, dal-on niya ini sa korte.
“If you don’t have brain, just f*ck! Go away,” suno kay Robertsen. “Do you know Filipino… Filipino Privacy Law? You are not allowed to take pictures,” dugang pa sini.
Nahibaluan nga antes pa man ang konsultasyon subong nga adlaw, madamo na ang nagpakamalaot kag naakig sa amo nga proposed development sang 10-hectare hyperscale AI data center campus. Ini nga ginaproponer nga pasilidad ang gindesinyo nga may kabug-usan nga load capacity nga 50 megawatts (MW).#
