ILOILO – Mahimo nga ang duha ka telecommunication companies ang may problema sa signal nga ginareklamo sang mga pumuluyo sang Brgy. Nanga Pototan, kag indi ang signal jamming device nga nahamtang sa Iloilo District Jail (IDJ).
Ini ang personal nga panan-aw ni Iloilo Second District Board Member June Mondejar, chairman sang Committee on Public Order and Safety, base sa ila ginpatigayon nga inspection sa lugar kahapon nga adlaw.
Kaupod ni Mondejar nga nagpadulong sa IDJ sanday Board Member Ramon “Monsik” Sullano, chairman sang Committee on Transportation, Communication and Public Ultilities kag Board Member Matt Palabrica.
Sa interview sang Bombo Radyo kay Mondejar, iya ginpahayag nga ila gintuman ang panugyan sang National Telecommunication Commission (NTC) nga magsekyar sang apat ka lokasyon ukon test points agud nga ma-check ang signal sa lugar.
Ila ini ginhimo nga duha ka metros, 19 ka metros, 29 ka metros ang kalayuon nagikan sa jamming device kag ginbutang ang isa sa guwa sang gate sa pihak nga karsada.
Suno kay Mondejar, kon ila tawgan ang ila upod nga yara sa nasambit nga mga test points, may yara man sang signal, gani nga makasabat man sang tawag kag makabaton sang text.
Mahimo man suno kay Mondejar nga ang unit sang cellphone ang may problema.
Nagapati man si Mondejar nga indi de-kalidad ang signal jamming device sa IDJ amo nga indi sini mapatay ang signal bisan sa duha ka metros nga distansya.
Sa ila impormasyon, nagabalor lang sang P8,000 ang kada jamming device, kag indi state-of-the-art suno sa board member.
Plano man nanday Modejar kag sang Sangguniang Panlalawigan nga ipatawag ang duha ka telecommunication companies sa isa ka committtee hearing sa masunod nga semana agud makuhaan sang pagpaathag.
