Maga-umpisa na sa Disyembre 27 ang pagpatuman sang SIM Card Registration Act.
Sa interview sang Bombo Radyo kay Atty. Deo Tan, legal officer sang National Telecommunications Commission Region 6, iya ginpahayag nga may yara sang penalidad sa mga telecommunication companies kag sa mga subscribers nga mapaslawan nga magsunod sa layi.
Ini ang kasunod man sang pagpagwa sang implementing rules and regulations para sa SIM Card Registration Act.
Ang mga Subscriber Identity/Identification Module ukon SIM sang telco subscribers nga magpamalibad nga magparehistro ang i-deactivate.
Ang mga telco operators ukon public telecommunications entities nga magpamalibad nga magparehistro sang Subscriber Identity/Identification Module nga wala sang valid reason ang multahan tubtob P1 million.
Sa amo nga layi, ang tanan nga SIM lakip na ang eSIMs kag mangin ang para sa data lamang kaangay sang ginagamit sa wireless broadband modems, machine-to-machine communications kag internet of things ang dapat man nga iparehistro.
May yara sang 180 ka adlaw lamang humalin sang effectivity sang layi ang mga subscribers nga magparehistro sang ila SIM.
Ang mga indi marehistro nga SIM ang indi na mahimo nga magamit.
Ini ang mahimo nga ma-reactivate pagkatapos nga marehistro apang dapat nga indi maglapaw sa lima ka adlaw pagkatapos sang deactivation.
Ang registration ang himuon electronically pinaagi sa isa ka secure platform ukon website nga ihatag sang telcos.
Kinahanglan lang nga maghatag sang kumpleto nga pangalan, birth date, sex, official address, type sang ID nga gin-present kag ang ID number.
Ang mga negosyo naman nga mag-register sang ila pangalan ang kinahanglan nga mag-provide sang ila business name, address kag full name sang authorized signatory.
Ang mga foreign nationals naman ang dapat nga mag-present sang passport kag address sa Pilipinas.
May nagahulat nga duha ka tuig nga pagkapreso kag multa nga tubtob sa P300 thousand ang sin-o man nga maggamit sang peke nga pangalan.
Mahimo man nga mamultahan sang tutob P300 thousand kag pagkapreso nga tubtob sa anum ka tuig ang madakpan nga nagbaligya sang registered SIM nga wala nag-comply sa required registration.
