ILOILO CITY – Dako ang adjustments nga pagahimuon sang Simabahan Katolika bangud sa pagkansela sang mga misa kag aktibidad sa Semana Santa may kaangtanan sa pagpamahog sang coronavirus disease 2019.
Sa interview sang Bombo Radyo kay Fr. Angelo Colada, Director sang Social Communications sang Archdiocese of Jaro, iya ginpahayag nga mabudlay para sa mga kaparian amo man sa mga tumuluo ang pagkansela sang mga aktibidad apang wala man sang may mahimo ang simbahan bangud ini ang panugyan sang gobyerno kag Department of Health.
Suno kay Colada, tanan nga congregational gatherings ang kanselado – mangin ang Domingo de ramos kag prusisyon.
Pahayag niya, ang mga misa sa subong ang ipaagi na lamang sa live streaming agud nga apisar yara sa sulod balay ang mga tawo, mahimo ini sa gihapon nga makabati sang homily.
Ginpangabay man ni Colada ang mga tumuluo nga pangamuyu-an ang kahilwayan sang tanan batuk sa COVID-19.
