ILOILO CITY – Wala ginkalipay sang Simbahan Katolika ang ginbuy-an nga pahayag ni Presidente Rodrigo Duterte tuhoy sa ginaduso sini sa kongreso nga pagpabalik sang death penalty sa mga durugista kag mga plunderers.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga maathag ang panindugan sang simbahan nga pagpamatok sa pagpatuman sang death penalty.
Suno kay Oso nakasulat sa Ezekiel Chapter 18 verse 23 nga indi gusto sang Diyos nga mapatay ang mga makasasala sa baylo mas malipay ini kun sila ang magbag-o kag magpangabuhi sang malinong.
Apisar nga adik kag plunderer suno kay Oso may kinamatarung man ini sa gihapon nga magbag-o kag indi dapat pag-idalok ang kinamatarung nga mabuhi.
Ginpaathag man ni Oso nga ang Diyos ang nagtahag sang kabuhi sang isa ka tawo kag siya man ang may kinamatarung sa pagbawi sini.
Nagapati naman ang natungdan nga indi mangin patas ang pagpatuman sang death penalty sa pungsod sa tion nga maislan ang konstitusyon bangud ang mga kubos nga akusado ang wala sang ikasarang agud magbayad sang mga hangkilan ukon lagting nga abogado kag sigurado nga indi na sila mahatagan sang kahigayunan pa nga mabuhi.
