Iloilo City – Wala nagapabaya ang simbahan katoliko sa papel sini agud matapna ang insidente sang bullying sa komunidad.
Sa interview sang Bombo Radyo kay Reverend Father Ildefonso Cachuela, resident priest sang Sta. Ana Parish sang Molo, Iloilo City, iya ginpahayag nga nangin aktibo ang simbahan agud mapanubuan ang insidente sang bullying paagi ang pagtukod sang nanari-sari nga mga organisasyon.
Suno kay Fr. Cachuela, ginatuyo sang amo nga mga organisasyon kaangay sang youth ministry ang pag-boost sang confidence sang mga pamatan-on agud kilalahon ang kaugalingon ilabi na ang spiritwal nga aspeto.
Ginpahayag sang natungdan nga bukas man ang simbahan sa pagbaton sang biktima sang bullying, kag maski ang nang-bully.
Matandaan nga sa data sang Department of Education Region 6, may yara sang 57 ka mga kaso sang bullying sa sulod sang eskwelahan sa Western Visayas para sa school year 2021-2022.
Nahibaluan nga sa 79 nga mga pungsod nga nagpartisipar sa Programme for International Student Assessment sang 2018, Pilipinas ang nakakuha sang pinakamataas nga insidente sang bullying.
