ILOILO CITY – Liwat ginpanindugan sang Simbahan Katoliko kag iban pa nga religious groups nga wala sila nagapahilabot sa pulitika kag naga-alagad sa sin-o man nga pulitiko.
Kasunod ini sang akusasyon sang Malacañang nga nagapakighimbon ang Simbahan sa pila ka grupo agud pukanon ang administrasyon ni Presidente Rodrigo Duterte.
Sa pagtililipon kahapon sang nagkalain-lain nga sekta sa Panay kag Guimaras nga gin-organisa sang Promotion of Church People’s Response (PCPR), gin-athag ni Archbichop Emeritus Angel Lagdameo sang Archdiocese sang Jaro, nga wala sang kamatuoran ang akusasyon nga may ginaluto sila nga destabilization plot batok kay Duterte.
Suno kay Lagdameo, wala sila sang labot sa sin-o man nga nagahari-hari bangud ang Diyos lang ang ila ginaserbisyuhan.
Ang presidente kag ang mga pulitiko suno kay Lagdameo naga-abot kag nagabiya, apang ang institusyon sang Simbahan nagapabilin.
Apang ginpabati-batian man sang anay Catholic Bishops Conference of the Philippines (CBCP) president si Duterte.
Suno kay Lagdameo, ang simbahan wala nagapalapnag sang sala nga imahe sang Diyos nga kaangay ginhimo-himo lang.
Ang Diyos nga ginakilala sang Simbahan suno kay Lagdameo amo ang nagsalbar sa kalibutan, may kaluoy kag nagapatawad.