ILOILO – Magasunod ang Simbahang Katolika sa mga protocol sang Inter-Agency Task Force for the Management of Emerging Infectious Diseases (IATF-EID) lakip na sa pagsulundan para sa tigkalalag.
Sa interview sang Bombo Radyo kay Father Angelo Colada, director sang Archdiocese of Jaro Commission on Social Communications, iya ginpahayag nga masami nga ginaangot sang simbahan ang mga protocol sa guidelines sang national government ilabi na agud malikawan ang transmission sang coronavirus disease 2019 (COVID-19).
Wala pa nakasapol ang Archdiocese of Jaro suno sa natungdan kag wala pa sang naistoryahan sa subong.
Suno kay Father Colada, wala man sang problema kun indi Nobyembre 1 ukon Nobyembre 2 magkadto sa patyo ang mga tawo bangud mahimo man sila makapangamuyo sa ila mga balay kag mahimo man sila makabisita sa ila nagtaliwan nga mga himata kag abyan sa bisan ano nga bahin sang tuig.
Nahibaluan nga base sa pahayag ni National Task Force (NTF) COVID-19 spokesperson Brig. Gen. Restituto Padilla, posible nga ipasirado sa publiko ang mga patyo sa Pilipinas kun mag-abot na ang All Saints’ Day kag All Souls’ Day ukon Undas subong nga tuig agud malikawan ang COVID-19 transmission.
Sa Manila, ginkumpirma na ni Mayor Isko Moreno nga siradhan sang syudad ang tanan nga patyo sa Oktubre 31 tubtob Nobyembre 3 bilang paglikaw sa pagtilipon kag paglaton sang COVID-19.
Sa probinsya sang Iloilo, nagpahayag si Iloilo Governor Arthur Defensor nga makigsapol anay siya sa mga ahensya sang gobyerno kag sa kaparian agud madesisyunan kun siradhan ukon limitahan lang ang makasulod sa patyo.
Sa syudad sang Iloilo, suno kay Mayor Jerry Treñas, pagatun-an pa ini sang COVID-19 team. #
(Photo is grabbed from: BluPrint)
