Nanindugan ang Simbahan nga kinahanglan gid nga madayon ang impeachment trial bisan pa nga madamo ang prediksyon nga indi man makuha ang gina-require nga boto agud nga ma-convict si Vice President Sara Duterte bangud kaalyado sini ang kalabanan sa senator-judges.
Sa idalom sang Konstitusyon, matabo lamang ang conviction kun ma-secure ang two-thirds majority sa 24-member Senate ukon katumbas sang 16 votes. Kun ma-convict, magakahulugan ini nga kakason siya sa vice presidency kag ipatuman ang permanent ban sa pagpangalagad sa public office.
Bangud sang panindugan subong sang majority sang mga senador, may mga nagahambal nga uyang lamang sa tyempo ang trial.
Sa interview naman sang Bombo Radyo kay Msgr. Meliton Oso, ang director sang Jaro Archdiocesan Social Action Center, iya ginpahayag nga importante gihapon ang trial bangud diri mahublasan ang kamatuoran kag magguwa sa atubang sang publiko.
May mga wala pa napakita nga mga ebidensya nga masaksihan lamang sang trial kaangay sang sealed box nga ginpasa sang Bureau of Internal Revenue (BIR) nga naga-unod sang income tax returns ni Duterte kag sang iya bana nga si Atty. Manases Carpio.
Gin-subpoena ini anay sang House Committee on Justice apang nagdesisyon ang mga kongresista nga indi anay pagbuksan ang kahon kag itugyan na lang kun mag-abot na ang trial agud nga malikawan nga mapaso sila sa teknikal nga aspeto.
Magluwas diri suno kay Oso, nagalaum gihapon ang Simbahan nga kun magguwa ang kamatuoran, matandog man ang legislators kag magdesisyon pabor sa kun ano ang husto.
Nahibaluan nga isa ang Archdiocese of Jaro sa mga nagasuporta sa nangin panawagan ni Catholic Bishops’ Conference of the Philippines (CBCP) President Gilbert A. Garcera sa Senado nga umpisahan gilayon ang impeachment trial.
Nagpirma man ang archdiocese sa statement nga ginpagwa sang Caritas Philippines Social Action Network nga ang anuman nga pag-atrasar sa proceedings nagakahulugan sang delay man sang hustisya sa mga Pilipino kag mismo sa Bise Presidente.#
