Nagpanawagan ang Archdiocese of Jaro sa mga tumuluo nga magpangamuyo nga magpangibabaw ang kamatuoran sa tunga sang mga kinagamo subong sa pungsod.
Antes nagsugod ang homily ni Rev. Fr. Aris James Java sa Jaro Metropolitan Cathedral, Jaro, Iloilo City kadungan sang Piesta Solemne sang Pagkayab sang Ginoo, ginplastar sini nga sa tuman ka damo nga hitabo subong sa pungsod, may yara man sang tagsa-tagsa ka interpretasyon sang kamatuoran ang lain-lain nga bahin sang sosyudad.
Kun kaisa suno sa iya, mabudlay magdesisyon kun sin-o ang patihan.
Sa tunga sini tanan suno sa iya, dapat ipangamuyo sang mga tumuluo nga magaguwa ang kamatuoran.
Dapat man pangabayon suno sa iya nga indi matiplang ukon mapalapaw sang mga tawo nga nagapalapnag sang kabutigan sa nasyon.
Nahibaluan nga antes sini, ginpabutyag man sang Archdiocese of Jaro ang suporta sini sa panawagan sang Catholic Bishops Conference of the Philippines (CBCP) sa Kamara kag Senado nga maghimo sang ila katungdanan nga may integridad kag hustisya, kag magtipon dayon para sa kamatuoran kag kaayuhan sang pumuluyo nga Pilipino.
Ini may kaangtanan sa nagapadayon nga impeachment case nga naga-involve sa Bise Presidente sang Pilipinas kag sa nagataas nga tensyon sa gobyerno.
Ginpanawagan man ang tanan nga mag-ampo para sa mga lider sang gobyerno agud magdalom ang ila pagpati sa accountability kag transparency kag agud magpangibabaw ang hustisya kag kalinong sa pungsod.
