Lain-lain ang reaksyon sang mga tawo kaangot sa diskusyon sa Artificial Intelligence ukon AI.
Apang nakahibalo ka bala nga indi lamang sa commercial ukon business industry ukon sa patag sang edukasyon ginagamit ang AI kundi mangin sa simbahan?
Agaw-atensyon gid ang ginhimo sang gamay apang dumaan kag maragtason nga simbahan nga amo ang St. Peter s Church sa Lucerne, Switzerland matapos nag-install ini sang AI-Powered Jesus Christ nga makahambal sang tubtub sa 100 ka lengguwahe.
Gintawag ini nga “Deus in Machina” nga in-install sa confessional booth sa sulod sang simbahan sang nagligad pa nga Agusto 2024.
Kun magkadto ang mga tawo sa confessional booth, makit-an sa sulod sini ang screen kun sa diin makit-an ang avatar ni Jesus Christ nga mala-“hologram.”
Naka-program ang theological texts kun sa diin magahalin ang iya mga sabat.
Sunod nga gin-imbitaran sang simbahan ang visitors nga mag-atubang sa hologram ni Jesus nga nagasabat man sang real-time.
Paathag ni Marco Schmid, isa ka theologian sa St. Peters Church, gin-abisuhan man nila ang visitors nga AI-generated ang ila istoryahan kag indi dapat sila mag-pangumpisal ukon mag-disclose sang mga personal nga impormasyon.
Ginklaro man nga isa lang ini ka experiment bangud gusto mahibaluan sang simbahan kun ano ang reaksyon sang tawo nga naga-istorya sa AI ni Jesus Christ kag kun ano ang gusto nila ipamangkot.
Sa duha ka bulan nga naga-operate ang Jesus avatar, nagdangat na sa masobra 1,000 ang mga bisita sa simbahan kag nag-atubang sa AI-powered Jesus Christ.
May mga Muslim pa gani nga nagkadto kag mga tawo halin diri sa Asya.
May mga bisita nga nagpakigbahin nga isa ka spiritual experience ang pakipag-istorya sa AI-powered Jesus Christ samtang may iban naman nga wala nanamian kag may reporters naman nga nagmuno nga sulit-sulit ang sabat sang AI kag cliche.
May iban naman nga negatibo gid ang reaksyon sa ginhimo sang local church sa avatar Jesus kag may Catholic colleagues nga nagaprotesta sa paggamit sang confessional para sa sini nga “experiment”.
Natalana nga igapresentar subong nga semana ang data sa installation sa sini nga avatar agud mahibaluan dugang ang ila nga mga reaksyon.
