Gindayaw sang Simbahang Katolika ang pagpanguna sang Florete Group of Companies sa pagdonar sang 100 ka sako sang super white rice sa mga residente nga apektado sang Enhanced Community Quarantine (ECQ) sa syudad sang Iloilo.
Sa exclusive interview sang Bombo Radyo Msgr. Meliton Oso, director sang Jaro Archdiocesan Social Action Center, iya ginpahayag nga kaangay sang mensahe sang ebanghelyo, sa diin ginatawag ang tanan sang Diyos nga mangin maalwan kag mabinuligon sa mga ginagutom, nangin isa ka dako nga ehemplo ang Florete Group of Companies sa paghatag sang bulig sa mga pumuluyo sang syudad.
Suno kay Oso, sang nagsaulog sang ika-55 nga anibersaryo sang Florete Group of Companies, madamo man sang ginpalab-ot nga bulig ang kompaniya sa Simbahang Katolika kag komunidad.
Pahayag ni Oso, nagapasalamat ang bug-os nga Simbahang Katolika sa Florete Group of Companies sa diin nagapangabay siya nga magserbe ini nga ehemplo sa iban pa nga pumuluyo kag kompaniya nga maghatag sang bulig kag kabalaka sa isig-katawo sa tunga sang nagapadayon nga pandemya.
