ILOILO CITY – Mahimo nga may yara lang sang misinterpretation sa nangin pahayag ni Pope Francis may kaangtanan sa iya pagsuporta sa civil union sang Homosexuals.
Ini ang pahayag ni Rev. Fr. Joenick Territorio, canon lawyer kag chancellor sang Archdiocese of Jaro, kasunod sang nanari-sari nga reaksyon sang publiko may kaangtanan sa panindugan sang Santo Papa.
Sa interview sang Bombo Radyo kay Territorio, iya ginpahayag nga mahimo nga may yara lang sang misinterpretation sa tinaga nga civil union kag marriage.
Suno kay Territorio, ang civil union ukon civil partnership ang makabig nga arrangement kasubong sang kasal apang ini ang nasanto sa layi nga para sa same-sex couples samtang ang marriage ukon matrimony amo ang culturally recognised union sa tunga sang babayi kag lalaki santo sa church values.
Ginpahayag ni Territorio nga sa ginbuy-an nga pahayag ni Pope Francis, maathag nga ang iya lamang nga ginasuportahan amo ang civil rights sang LGBTQ+ kag indi ang pagpahanugot sa pagpakasal sa simbahan.
Gin-athag man ni Territorio nga wala ginapakamalaot sang Simbahang Katolika ang sexual orientation ukon pagkatawo sang Homosexuals kundi ang mga malain nga buhat nga wala nasanto sa bibliya.
Kadungan sini, ginpahayag man sang natungdan nga wala nagabag-o ang panindugan sang Simbahang Katolika tuhoy sa pagdumili sa same sex marriage.
