ILOILO CITY – Nagapanawagan sang bulig si Archbishop Jose Romeo Lazo sang Archdiocese of Jaro para sa mga naapektuhan sang Bagyo Ursula sa Northern Iloilo kag iban pa nga bahin sang Western Visayas.
Suno kay Archbishop Lazo, bisan ano nga sahi sang bulig ang ginakinanglan sang mga pumuluyo nga naapektuhan sang Bagyo Ursula.
Para sa mga may bulawanon nga tagipusuon, mahimo nga ipalab-ot ang bulig sa Jaro Archdiocesan Social Action Center nga ginapamunuan ni Msgr. Meliton Oso.
Tubig kag pagkaon ang labi nga ginakinahanglan sang mga naapektuhan sang bagyo sa Northern Iloilo.
Suno kay Msgr. Oso, mahimo man nga magdonar sang construction materials, bayo ukon kwarta.
Ang donasyon ang mahimo nga dal-on sa opisina sang Jaro Archdiocesan Social Action Center sa kilid sang Jaro Cathedral sa sulod sang St. Pius 12 Pastoral Center.
Sa pagkamatuod suno kay Msgr. Oso, buwas nga adlaw, natalana nga igapanghatag ang una nga hugnat sang relief goods para sa mga pumuluyo sang Balasan, Iloilo.
Ang dugang nga donasyon ang tipunon agud nga mahatag sang tingob para sa mga pumuluyo sang iban nga banwa sa Northern Iloilo.
Para naman sa mga maluyag magdonar nga yara malapit sa Northern Iloilo, mahimo nga iderekta ang donasyon sa mga kura paroko sang tagsa ka banwa.
