Magasugod na ang Semana Santa sa Abril 10 nga amo man ang pagsugod sang Domingo de Ramos.
Ang kwarisma ang magatapos sa Huwebes Santo sang aga.
Samtang, ang Paschal Triduum nga amo ang tatlo ka balaan nga adlaw sang paskua nga magasugod sa Huwebes sang hapon nga misa nga amo ang katapusan nga panihapon tubtob sa Sabado sang gab-i sa pagsaulog sang vigilia sang paskua sang pagkabanhaw sang Ginoong Jesus Kristo.
Sa interview sang Bombo Radyo Rev. Fr. Angelo Colada, ang direktor sang Commission on Social Communication sang Archdiocese of Jaro, iya ginpahayag nga matapos ang duha ka tuig nga gindumili-an ang tanan nga religious activities, ginkalipay gid sang simbahang katolika nga mahimo na patigayunon ang mga liturgical activities subong nga tuig.
Yari ang ginpagwa nga mga pagsulundan kag mga aktibidad sang Simbahang Katolika para sa Semana Santa:
- Ginbalik na ang pagbisita sa mga Apostoles sa tagsa ka mga puloy-an (ini ang nakadepende sa discernment sang parokya)
- Ginbalik naman ang viacrusis (depende na sa simbahan kun paano ini ipatigayon)
- Sacrament of reconciliation ukon pagkumpisal (mahimo na nga magpadulong sa tagsa ka parokya para sa schedule sang pagkumpisal) kag;
- Parish recollection
Sa Domingo de Ramos ukon Palm Sunday, ang mga tumuluo ang yara na sa sulod sang simbahan, sa ila tagsa ka mga pulungkuan kag wala na sang pagtililipon kag prosesyon.
Mahulat na lang ang mga tawo uyapot ang ila mga ramos sa pagbendisyon sang Pari nga halin sa pwertahan sang simbahan tubtob nga makalab-ot sa altar para sa misa uko pasyon.
Sa Holy Monday, pagasuguran ang virtual recollection nga patigayunon kada las 6:00 sang gab-i.
Sa Huwebes Santo, may yara sang misa sa aga sa Jaro Metropolitan Cathedral.
Ibalik naman ang paghugas sang tiil sang 12 ka mga apostoles sa misa sang Huwebes santo sa gab-i.
Gintugutan naman ang Visita Iglesia apang, nagpanugyan ang simbahang katolika nga sundon gid ang mga health protocols kag likawan ang pagdinugok.
Sa Byernes Santo, mahimo ngagihapon nga padayunon ang visita iglesia. Samtang, sa aga naman ang praying sa station of the cross kag magasugod las 12:00 sa udto ang syete palabras nga base sa pito ka katapusan nga pulong sang Diyos.
Pag-abot sang las 3:00 sa hapon amo nama ang pagsimba sa Krus.
Gin-athag man sang Simbahan nga ginapa-iway ang pagtandog kag paghalok sa mga sa imahen.
Wala naman sang pagduaw apang bukas ang simbahan sa pagpangadi.
Pagkatapos sa pagsimba sa krus, may yara sang patigayunon nga foot prosesyon.
Sa pag-obserba sang kwarisma, ginapangabay sa mga deboto nga pangamuyuan nga matapos na ang kinagamo sa Russia kag Ukraine, ang malinong kag matawhay nga palaabutonb nga eleksyon kag ang pagtapos man sang COVID-19 pandemic.
