ILOILO CITY — Ginkakibot sang Simbahang Katoliko ang madasig nga hulag sang house bill 9349 ukon ang ginaduso nga divorce bill.
Ini kasunod sang gin-aprobahan sa ika-duha nga pagbasa sang House of Representatives ang amo nga hagna.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center (JASAC), iya ginpahayag nga apisar nga ma-aprobahan pa ang hagna sa sunod nga pagbasa sang House of Representatives, nagapanindugan ini nga indi ini pagsuportahan Simbahang Katoliko.
Suno kay Oso, ang henerasyon subong ang wala na nagahatag sang importansya kag kahulugan sang isa ka kasal.
Nagpanugyan man ini sa mga katoliko nga hibaluon ang sakramento sang kasal agud mapasangkad ang ihibalo sa ginakabig nga balaan nga kasal.
Gintawag naman sang natungdan nga ang divorce bill ang isa ka legal apang imoral.
Nahibaluan nga 19% sa mga Filipino ang naga-live in subong kag mas ginapili nga indi magpakasal.
