ILOILO CITY – Magapatigayon sang simultaneous spraying sa tagsa ka barangay sa syudad sang Iloilo agud nga matapna ang pagduging sang Dengue Hemorrhagic Fever.
Ini ang kasunod sang Executive Order 007 nga ginpaguwa ni Iloilo City Mayor Jerry Treñas nga nagamandu sa tanan nga Barangay Officials nga magpatigayon sang pagpaninlo sa palibot agud nga matapna ang pagdamu sang lamok nga nagadala sang nasambit nga balati-an.
Sa interview sang Bombo Radyo kay Liga ng mga Barangay President Irene Ong, iya ginpahayag nga iya na nga gina isa-isa ang mga barangay council sa syudad agud hibaluon kun may yara sang kaugalingon nga sprayer.
Kun 80% sa mga barangay sa syudad ang may yara sang kaugalingon nga sprayer, ginpahayag ni Ong nga magadesisyon ang Liga ng mga Barangay kun anu nga adlaw patigayunon ang simultaneous spraying sa syudad.
Samtang, padayon naman ang kampanya ni Punong Barangay Pascual ‘Sipil’ Espinosa agud nga indi na madugangan ang numero sang biktima sang Dengue Hemorrhagic Fever sa ila lugar sa Brgy. San Juan, Molo, Iloilo City.
Sa interview sang Bombo Radyo kay Espinosa, iya ginpahayag nga ang ila lugar ang makabig nga ‘catch basin’ sa tion nga mag-ulan rason nga madamu sang lamok sa palibot.
Magluwas diri, madugay man nga maghubas ang tubig suno kay Espinosa.
May kaangtanan diri, ginpahayag sang punong barangay nga magapatigayon sang misting sa palibot sang ila barangay agud nga mapatay ang lamok nga nagadala sang balati-an.
