ILOILO CITY – Indi tanan nga driver ang mahimo nga maka-avail sang 10-year validity sa driver’s license santo sa Republic Act 10930.
Sa pagpaathag sang Law expert nga si Atty. Charl Stuyver Moleño, ang Republic Act 10930 ukon mas kilala bilang hagna nga nagapasangkad kag nagapatuman sang istrikto nga proseso sa pagkuha kag nagapalawig sang validity sang driver’s license lakip na ang paghatag sang nagakaigo nga silot sa tagsa ka violation santo Land Transportation and Traffic Code.
Suno kay Atty. Moleño, ang effectivity sang nasambit nga hagna ang gintalana sa Oktubre 2021 matapos gin-aprobahan sang Kongreso sang 2017.
Ginpahayag ni Atty. Moleño nga sa subong, may driver’s license nga may yara lamang sang 3-year validity kag may yara man sang 5-year validity.
Ang mga mahimo lang nga maka-avail sang 10-year validity amo ang mga driver nga wala sang violation humalin sang 2019 kag ang mga naga-uyat lang sang driver’s license nga may 5-year validity.
Kabahin man sang istrikto nga proseso sa pagkuha sang driver’s license amo ang pagpaidalom sa seminar kag training sang mga aplikante.
May yara man sang demerit system nga ginasunod ang Land Transportation Office may kaangtanan sa pagdesisyon kun bala nagakadapat pa nga hatagan ukon bawi-an sang lisensya ang driver.
