Pila na ka bulan nga naga-duty sa Western Visayas Medical Center (WVMC) ang 36 ka mga health workers nga gin-augment sang probinsya sang Iloilo apang indi gihapon maathag kun sin-o sa Iloilo Provincial Government kag sa WVMC management ang ma-request para sa Special Risk Allowance (SRA) sa sini nga mga medical frontliners.
Hunyo 2021 sang nag-umpisa sa pag-duty sa ospital ini nga mga health workers.
Bangud adlaw-adlaw sila nga nagaatubang sa risgo nga matapikan sang COVID-19 bangud sa ila pagtatap sa COVID-19 patients, eligible sila para sa SRA nga P5,000 ang maximum kada bulan.
Nag-gwa sa report nga tubtub subong wala pa sang bisan isa sa 36 ka health workers ang nakabaton sini nga SRA in recognition sa ila adlaw-adlaw nga risgo.
Sa una nga interview sang Bombo Radyo kay Atty. Suzette Mamon, Iloilo Provincial Administrator, iya ginpahayag nga ang facility (in this case, WVMC) ang maproseso agud maka-request sa DOH kun pila nga pondo ang kinahanglan para sa health workers.
Kun naka-request na ang ospital, i-download ini sa Provincial Government kag ang probinsya ang maga-release sang kwarta sa health workers.
“Ang downloading sina, depende sa request sang facility,” pahayag ni Mamon. Suno sa natungdan, ang ospital ang nakahibalo kun “pila ang naka-duty, ang attendance, kag kun may na-infect sang COVID-19”.
Sin-o ang ma-process? “Capitol,” suno kay Mamon, apang “WVMC ang requesting authority” bangud diri naka-assign ang 36 ka health workers.
‘PAHAYAG SANG WVMC’
“Ang mother agency sina ang mahatag sang SRA. Ma-coordinate lang sila sa WVMC,” sabat naman ni Richard Saltin, spokesperson sang WVMC.
Sa interview sang Bombo Radyo kay Saltin, iya ginpahayag nga makabulig lang ang ospital kun may mga question; halimbawa, certification sa number of days sa duty, ukon may kwestyon sa Daily Time Record (DTR).
“Kun ano ang pangayuon sang province” suno kay Saltin “amo lang ang ihatag sang WVMC”.
“Ma-coordinate lang kami sa ila kun ano ang ila definition sang ila paghambal nga pag-process,” sabat naman ni Saltin sa pahayag ni Mamon.
Sin-o ang mahatag sang SRA? “Nakabutang diri sa guidelines nga mother agency ang mahatag sang SRA,” dugang pa ni Saltin. Rason ni Saltin, kun WVMC ang mahatag sang SRA, indi ini ma-justify bangud ‘in the first place, wala kami sang kuhaan sang budget kay indi namon sila personnel.”
